31/07/2010

播放本新聞相關短片

政情:五散人如願變五反人

本文重點
立法會早前馬拉松式連續三日激辯《最低工資條例草案》,其中以勞工界力爭將政府倡議嘅「兩年一檢」縮短為「一年一檢」嘅修訂案,爭持最為激烈,將辯論推向高潮。

聞說就喺踩通宵嘅當日晚上,勞工及福利局常任秘書長鄧國威喺立法會前廳,多次拉住林大輝等三人密斟做最後游說,但點都搞唔掂佢哋,三人最終中間落墨,對「一年一檢」既唔支持,亦唔反對,走咗去附近茶餐廳食燒味。

同政府劃清界線

睇番投票結果,「一年一檢」修訂案即使多咗大輝等三票,都仲爭兩票先至能闖關成功,但形勢驚險,令政府抹一把汗。消息話,政府事前數票,計埋大輝三人,十拿九穩,點知「五散人」臨到最後一刻先至變卦,政府即時陣腳大亂,倒瀉籮蟹。經此一役,聽聞政府對五散人嘅「反叛」同立場反覆產生好大戒心,仲私下稱呼佢哋做「五反人」,暗諷五人隨時「作反」,唔多靠得住。

五散人無端端多咗個新花名,相信佢哋唔會介意,觀乎五人近期表現,都係處心積慮想同政府劃清界線,成為左右大局嘅中間力量。佢哋成日剃政府眼眉,無非想突出自己嘅中立角色,以後改名叫五反人,隱含同政府反面、反枱嘅意思,可以話係求仁得仁!

為應屆會考生打打氣,請瀏覽on.cc 東方互動《放榜無限分2010》專輯