香港人生活節奏咁急促，去旅行當然係想減壓啦，但富貴黨常委田北辰同家人旅行，原來係想搵個最靚嘅時機傾心事。六月中，田二少三女Lavina喺美國哈佛大學商學院MBA（工商管理碩士）畢業，做老竇嘅就請Lavina遊法國、西班牙同奧地利十日當慶祝，順便傾吐從政辛酸事。
田二少話旅程最難忘係法國清新嘅空氣同潔淨嘅街道，佢喺法國嗰幾日，每朝同Lavina唔着鞋喺酒店附近街道赤腳行街，體會真正嘅「自由行」樂趣。
田二少有三女一仔，但甚少一家六口去旅行，通常拍住老婆或者其中一個仔女出發，話咁至傾到心事喎。佢今次亦唔例外，沿途同Lavina訴說從政感受，話從政路唔易行，香港社會反商情緒嚴重云云。Lavina輔導番老竇，叫佢擴大政治光譜，搶佔高層管理人員同專業人士票源。田二少笑言，Lavina已獲企業顧問大行McKinsey聘用，九月返工，今次歐遊得到McKinsey員工嘅專業意見，請客都請得特別開心。