31/07/2010

播放本新聞相關短片

政情:龔仁心無緣歎米埔基圍蝦

上禮拜米埔舉行一年一度嘅基圍蝦蟹收成聚會,搵咗新田鄉事委員會主席文富穩聯絡各界友好出席,包括有華懋集團執行董事龔仁心夫婦、時裝設計師William鄧達智、信和集團總經理余漢坤夫婦等,大家飽覽米埔嘅自然環境之外,仲齊齊勁擦新鮮基圍蝦。

龔仁心夫婦係首次出席米埔收成聚會,仲帶咗個小朋友去見識吓。佢哋兩公婆為今次郊遊做足準備,着住情侶裝波鞋,出發前又噴定蚊怕水,並且獲好友送贈竹蔗水清熱消暑。龔仁心對大自然好有興趣,沿路參觀淡水池塘、魚塘、紅樹林、蘆葦叢、蓮花塘同鷺鳥等,又研究青蛙產卵同細心觀察蓮葉上嘅蜻蜓脫殼過程。

當日嘅戲肉係傍晚潮退時捕捉基圍蝦。每年四月至十一月都係基圍蝦收成期,平均可收成八十次,米埔人員會喺水閘口設置魚網,然後打開水閘等基圍內嘅塘水湧入海灣,啲蝦就會隨水流進入魚網。當晚嘅收成相當唔錯,烚咗五大盆新鮮基圍蝦,仲有文富穩提供嘅枝竹炆花腩、老火陳皮鴨湯、炆豬手豬腳、黃酒雞、銀杏豬肚,同埋好醒胃嘅子薑菠蘿等。不過,龔仁心夫婦同個細路就有要事早走,無緣享受呢餐美食!

為應屆會考生打打氣,請瀏覽on.cc 東方互動《放榜無限分2010》專輯