吳斌戴住青蘋果綠嘅領呔同袋巾現身記招，單睇外表都幾醒神。成份報告有成十五頁紙，當中力數八達通九宗罪同公署十二項建議，差公署就事件嘅結論就叫百分百完成。

呢次吳斌旋風式完成調查同出報告，效率之高本身應記一功，但以佢趕頭趕命，搶住喺離任前夕開記招嘅做法，好難令人唔質疑佢係為出風頭，順便幫自己「洗底」。吳斌話佢係以球員心態去處理呢件事，即係好似落場踢世界盃咁，都想踢到吹雞完場嗰刻，所以要喺任期內做好成件事，起碼唔使留畀下任接手喎！梗係啦，呢件事完成咗可以領功，肥水不流別人田吖嘛！

重提舊事想捧高自己

其實記招一開始，吳斌已經有意無意咁讚自己，佢憶述五年前啱啱上任專員一職開記招時，記者都係蜂擁而至，墟冚程度同尋日有過之而無不及。言下之意，佢即係話自己一直都受傳媒歡迎啫，不過專員上任見傳媒係必然嘅事，佢舊事重提擺明係捧高自己啫！

提到有「針孔署長」之稱嘅接任人蔣任宏，吳斌忍唔住暗寸曾經同佢隔空駁火、鬧過佢係「退休」心態同狠批佢「大花筒」嘅審計署署長鄧國斌。吳斌話自己唔會好似「某啲人」咁，人身攻擊他人，仲透露已經專登叫同事準備普通茶點歡送佢，咁就唔驚再畀人鬧「大花筒」啦！

不過，正所謂「清者自清」，吳斌下下將「大花筒」醜聞掛喺口邊，咁就未免太心胸狹窄喇，亦顯示佢對呢單醜聞好放唔低。以咁樣嘅表現，仲話想借八達通嚟「洗底」喎，只會令人覺得佢愈描愈黑添！