政府統計處尋日公布最新人口推算數字，未來三十年本港人口將增加近二百萬，二○三九年整體人口將接近九百萬。雖然毛澤東話過，人多好辦事，不過對香港嚟講，可能係人多好濕滯。

當局估計，到時六十五歲以上人口嘅比例會大幅上升，達到兩成八，即係唔到四個人就有一個係長者。如果安老政策跟唔上，搞到老人家晚景淒涼，和諧社會諗都唔使諗。

講真，人口老化係全球性嘅大趨勢，非香港獨有。平均壽命愈來愈長，出生率愈來愈低，社會進入高齡化不過係時間問題。政府最應該做嘅，就係未雨綢繆，做好應變準備。

就以日本為例，呢個國家早喺○六年已經出現人口負增長，步入高齡化社會。日本政府並冇翹埋雙手，反而採取積極措施，除咗改革退休金制度，仲採取「補貼促進生育」等政策，減緩人口老化嘅速度，由於及早規劃，大大紓緩咗人口老化帶來嘅壓力。法國、瑞典等先進國家亦採取類似政策，促進人口增長。

叮！弊在港府並冇長遠、可行嘅安老整體規劃，一向講多過做，令老人問題成為社會嘅計時炸彈。如果一早借鏡外國經驗，先有規劃，再按部就班推行落實，港府又點會成日畀人鬧「虐老」吖？

望吓港府張「安老」成績單，直頭慘不忍睹。呢嗱，港府安老服務同實際需要嚴重脫節，一直為人詬病，舊年喺輪候安老院宿位期間過身嘅長者超過四千五百個，但當局增加宿位依然好似揤牙膏咁，唔止於事無補，仲令供求失衡不斷惡化。

港府為平息眾怒，提出所謂「居家安老」虛應故事，但又冇足夠配套措施去執行，結果好多長者死喺屋企都冇人知。石硤尾大坑西邨前排就揭發一宗長者夫婦死去多時至被發現嘅人倫悲劇。「居家安老」變「閉門等死」，認真夠諷刺咯。

仲有呀，長者可以享受嘅福利少之又少，而且限制多多。唔少老人家為生計，一把年紀都要繼續搏。呢，上次因為響應港府呼籲，酷熱天氣停車熄匙，暈倒車廂最終不治嘅小巴司機，原來已經年過八十。冇得弄孫為樂，仲要出嚟捱騾仔，你話係咪香港嘅悲哀吖？

人口老化升級，安老咪再齋噏。如果冇長遠嘅安老保障規劃，又唔相應增加資源同及早做好配套措施，繼續一毛不拔，齋煲冇米粥，咁嘅政府只有兩個字可以形容：忤逆！