本文重點
因為迷上梁家傑，才二十出頭的林詠妍（La La）決定加入公民黨，「傑哥前、傑哥後」的La La自言是梁的粉絲，但不要當她是白癡，「我入黨係要從政，為社會做啲嘢」；被網民封為「公民黨女神」，手拿一本《公民抗命》的她說：「我只係好彩，呢個圈（政治圈）太少女仔，好易受注目。我知自己唔夠叻，要好努力睇書學。」
戴Cap帽、穿T恤短裙踢拖，La La看起來有幾分似港姐葉翠翠。被封為「女神」，有否沾沾自喜？她斬釘截鐵說：「唔想只係靠樣過日子」。「細個冇人教我（政治），直至中六嗰年，中史阿Sir同我講時事，啟發我關心社會發生嘅嘢。有一日，天星碼頭可以話拆即拆，嗰刻好想喊，點解個社會窮到只剩低錢？」
揚言不想只做乖女的La La，曾在學校民主牆貼文章吶喊。「好驚有一日團火會冚熄……傑哥係我從政嘅推動力，○七年佢選特首，睇住電視聽佢演講，即晚就上網睇入黨嘅方法。」La La就讀教院幼兒教育學系，明年畢業後，「理所當然」做幼稚園老師，「就算做老師，都會教小朋友要識自己思考。」
日日讀尼采 討厭被叫港女
「要長久做落去，一定要有理想、知識及能力。」滿腔熱誠的La La希望將來攻讀政治學碩士，「唔想畀人標籤我只係個fans，咩都唔識，成個白癡咁。學多啲嘢先出來選舉，目標唔一定係區議員或立法會議員，可以參與政治就好。」入黨後她試過撐梁家傑、撐公投、反高鐵，又在七．一遊行派傳單，「我依家朝早九點就去圖書館，睇《公民抗命》、尼采等，夜晚瞓唔着又睇，一日唔睇書會內疚。好驚起步太遲……」
她才不過二十二歲，在香港土生土長，但討厭被叫港女。「大家好興互相標籤港男、港女，以前我都追名牌，幾千蚊買條牛仔褲。近幾年先醒咗，覺得物質唔係咁重要，但成個社會話你知，貪慕虛榮係正常。諗深一層，邊個搞到咁？」
林詠妍小檔案
年齡： 22
學歷： 東華三院陳兆民中學、香港教育學院幼兒教育學系三年級
理想職業： 政治人物、大學教授、作家、記者、律師
愛情觀： 「愛情好似零食，有會開心，但唔係必需。」
最近閱讀書籍： 《公民抗命》（安德魯．科可）、《瞧！這個人》（尼采）、《First Among Equals》（Jeffrey Archer）