立法會為方便議員、議員助理同秘書處職員上網查閱新聞資料，自九八年起購買電子剪報服務。呢項服務一啲都唔平，立會每年要花約一百萬元，而且係限量使用添！秘書處最近統計過議員使用呢項服務嘅情況，範圍由舊年五月到今年六月，一睇嚇親人，個個月都超出上限，最誇張嗰兩個月，總用量竟超標接近一倍。
秘書處由今年五月起實施新措施，每位議員改以獨立帳戶進入剪報系統，邊個「大使」，邊個「慳家」，一目了然。秘書處通告不點名指出，有六名議員好唔自律，竟然喺過去兩個月都分別點擊超過五千次，即係超過一千五百次基準嘅三倍，大幅拉高整體點擊次數，唔爆燈超標至出奇啦。
據聞個別議員帳戶點擊量超標，原因係有人將帳戶密碼外洩，令其他人免費上網查閱新聞。咁秘書處梗係要立即嚴打呢啲濫用公帑嘅行為喇。