「又襟又準又夠格，戴錶請戴英納格」呢個廣告口號街知巷聞。由阿公開始已喺中國代理瑞士品牌「英納格」（Enicar）名錶，作為第三代代理嘅英納格大中華區總裁高鼎國，從來冇喺下屬面前擺老闆款，反而事事親力親為，令佢喺五年內令品牌銷售額勁升十倍。不過，三十出頭嘅高鼎國並冇自滿，反而謙卑歸功於公公李惠利同爸爸高叔平打落嘅江山。
身兼香港鐘表業總會副主席嘅高鼎國，除咗做生意外，亦希望好似公公同爸爸咁做善事回饋社會。佢積極參與香港青年聯會常務會董嘅工作，早前捐咗一百萬元畀滬港青交流促進會，同青聯合辦全國青少年世博體驗團，佢亦隨團同成班後生仔女打成一片，玩得好開心。
