行貨iPhone 4今日凌晨起喺香港開始發售，除咗一眾iPhone粉絲同IT發燒友，好多其實唔係好識IT嘅潮人都熱烈追捧，貪佢夠晒型仔，但係IT潮人互聯網協會主席莫乃光就反其道而行，堅決唔買喎！點解今次佢會咁out呢？
用開iPhone 3G嘅莫乃光解釋，iPhone 4部分零件雖然升咗級，但其實將iPhone 3G嘅軟件升級後，已經做到iPhone 4嘅七、八成功能，加上佢早前已經買咗另一部同樣熱賣中嘅Samsung Galaxy S智能手機，為免浪費，所以暫時唔會跟風購買iPhone 4，等日後推出iPhone 5先再考慮換機。
雖然佢冇捧iPhone 4場，但就有買咗iPad。行貨iPad上星期先喺香港推出，但佢早喺兩個幾月前已經託朋友喺美國買咗部水貨返香港用。佢大讚iPad上網同睇片都一流，不過文書處理系統就差少少，只認得簡體字，對於慣用繁體字嘅香港人唔太方便，尤其佢成日會喺報章上發表評論文章，用繁體字嘅機會非常多，對佢嚟講iPad仲未可以取代到一般手提電腦。