神舟五、六、七號三代六名航天員楊利偉、費俊龍、聶海勝、翟志剛、劉伯明同景海鵬，近日應中華總商會邀請訪港，尋日到尖沙咀科學館同三百名本港中學生真情對話，分享佢哋嘅航天心得。楊利偉話，佢哋幾位航天員經常要喺內地唔同地方受訓，好少見面，其中幾次難得聚首一堂都係喺香港，所以要特別多謝香港團體多次邀請佢哋來港。
有同學仔把握機會，詢問費俊龍有冇兌現承諾，返回地球後同囝囝一齊去釣魚，證實呢位同學事前有做足功課翻閱相關資料。費俊龍話梗係有喇，仲透露佢嗰個訓練營裏面有個小魚塘，可以畀佢哋閒來釣魚減壓。
為咗提高本港學生對國家航天事業嘅興趣同認識，中總最近捐出一百萬元資助三十位中學生下月到北京同西昌參加太空體驗營，等佢哋親身體驗吓航天員嘅訓練過程，楊利偉嘅老師、北京航太專家孫錦雲教授都會參與其中。