建制派湊夠人「同居」

重新劃位後，議員都係坐半年就換屆，照道理應該同邊個坐都冇乜所謂。之但係社民連三子入咗議會後，掟蕉掃枱、粗口爛舌，得罪人多稱呼人少，唔單止人如黨徽咁，係帶刺嘅紅玫瑰，應該話似食人花多啲，四圍咬人，唔少建制派議員都怕咗佢哋，唔想同三子共享一層辦公室。而喺政改方案一役後，社民連同溫和泛民主派分道揚鑣，白鴿黨當然唔希望同佢哋朝見口晚見面，所以都各自出招，為求同三子隔得愈遠愈好。

照依家最新形勢，建仔同工聯會加勞聯李鳳英已經湊夠人霸咗一層，非常安全咁同社民連劃清界線；白鴿黨亦搵咗李卓人、梁耀忠等七個溫和泛民一齊坐，可以同三子講拜拜。睇見呢個情況，剩低嘅建制派政團開始出現危機意識，聽聞富貴黨、五散人、公文袋同獨立議員葉劉淑儀十四個已湊埋一組，只要搵多個人，就可以完全撇甩社民連，唔使再驚有人係佢哋附近爆粗。

四層辦公室有三層就滿額，已經埋咗班嘅有林健鋒在內嘅專業會議（4P）、「大舊石」石禮謙牽頭嘅經濟動力（4L）同詹Sir二人組就好危險，皆因佢哋同其他三個建制派議員，計埋都係得十三人，係最少人數嘅組合。

以立法會秘書處多人優先嘅原則下，好可能會叫其中一個冇黨派嘅建制派議員同富貴黨佢哋同一層，喺咁嘅形勢下，4P同4L就變相要硬啃社民連，亦可以話社民連呢棵食人花追住咬4P同4L嘞，睇怕到時就是非多囉！