突然諗起扑傻瓜，唔係玩集體回憶，而係因為呢個「假保育」政府。環境優美嘅西貢大浪西灣畀富商意圖興建私人樂園，立法會尋日討論有關議題，議員狂炳港府後知後覺，反應遲鈍。當局知衰，宣布將大浪西灣納入發展審批地區圖，話日後任何未經政府批准嘅開發，都屬違法喎。

咪開心住！莫講刊憲程序需要一定時間，期間唔排除有人繼續破壞環境；按照港府解釋，受破壞地段屬私地，唔可以強制要求修復。即係話大浪西灣可能永遠都生撻瘌。

叮！本來水清沙幼，景色美不勝收，畀人搞到瘌痢頭咁。當局話，全港共有七十七幅好似大浪西灣咁，喺正郊野公園隔籬嘅私地。呢啲咁有生態價值嘅土地資源，居然有三分之二都未納入發展審批地區圖。唔怪得有議員批評政府，每次都係出咗事至補救，「唔見棺材唔流眼淚」。亦有議員指當局冇計劃主動規管，好似扑傻瓜咁，「出一次頭至扑一次」。

話時話，就算紙上談兵，起碼要有張紙，連紙都冇張，講乜鬼保育吖？當局唔出事就唔做嘢，搞到呢度樹木冇清光，嗰度草皮唔見晒，勝景遲早統統玩完。

叮！扑傻瓜Game over就話可以重新嚟過啫，自然生態環境被破壞，可能永遠無法修復。大浪西灣搞到面目全非，家陣至用納入發展審批地區圖來凍結發展，就好似到成頭瘌痢至諗起搽生髮水，遲唔遲啲呀？

大浪西灣位居香港十大勝景之首，最近又被納入國家地質公園範圍，不可多得嘅自然景觀命運都咁坎坷，其他生態資源嘅保育狀況可想而知。

本報曾經踢爆，全港十二幅優先保育生態重地之一，有包括全球體形最細嘅「侏紅小蜻」在內眾多蜻蜓品種出沒嘅新界鹿頸，因為有人違例發展淪為非法堆填區，當局拖延執法，村民投訴近半年都冇結果。仲話優先保育，加速絕育就真。

生態保育齋噏，古蹟保育同樣大隻講。港島歷史建築景賢里拍過荷里活猛片《生死戀》等影視名作，喺市民眼中係寶，港府就當係草。當初原業主想保育，港府睬都懶睬；新業主大興土木引起社會關注，當局至急急腳將大宅列作古蹟，但好多富東方特色嘅建築同裝飾已經損毀，救唔番。

人文古蹟保唔到，天然資源守唔住，港府根本冇一套全面、周詳嘅保育規劃，踢一踢先郁一郁，衰一鑊補一鑊。咁鍾意玩扑傻瓜遊戲，不如伸個頭出嚟畀市民扑番醒，咪再累人累物咯。叮！