本文重點
暑假本來係旅遊業收成嘅時候，但月初爆出導遊辱罵內地旅客事件後，本港旅遊業被抹黑晒，政府同旅遊發展局急急諗計自救，旅發局主席田北俊日前訪京同國家旅遊局官員見面，尋日財爺鬍鬚曾都去澳門，討論搞港澳「一程多站」遊。業界中人話，以香港家吓嘅情況，搞乜嘢路線遊都係假，消毒最重要，仲話田少近排心口掛個「誠」字，周圍推銷誠信遊，目的都係想挽回內地旅客嘅信心，希望佢嘅誠意打動到內地客啦。
鬍鬚曾尋日過澳門參加第三次港澳合作高層會議，其中一個討論焦點就係旅遊，希望推動區域旅遊。不過，呢一招可以話遠水不能救近火，事關內地客家吓對嚟香港旅遊好大戒心，點會因為多咗條路線就撲到嚟呢？政府要救旅遊業，就應該從消毒做起。
上京向官員解畫
反而啱啱去完北京嘅田少出招準啲，佢呢排先喺中央電視台代香港向內地遊客致歉，跟住又去北京同當地旅遊界人士會面，推介香港誠信遊，兼向國家旅遊局官員解釋事件經過，內地旅遊界點都睇到香港業界嘅誠意，有一定消毒作用。不過，業界認為，最重要係政府同旅遊業議會採取措施，避免再有劏客、旅客被不善對待嘅事件發生，如果唔係，做乜都冇用啦！