立法會新大樓明年底落成,佢哋早前公開徵求藝術品,經過首輪評審,選出十二個入圍提案,尋日仲喺依家嘅立法會大樓內展出設計草圖。不過,呢個展覽尋日拍晒烏蠅,成日只係得白鴿黨副主席劉慧卿一個人嚟睇,佢一邊睇,一邊對行政立法合作大潑冷水。
卿姐話藝術嘅嘢,真係各花入各眼,當佢行過一個名為「圓滿」、象徵「行政立法互相合作」嘅作品時,一睇已經有感而發,忍唔住大潑冷水話:「邊有可能吖!」言下之意係行政、立法要互相合作真係難難難。
今次入圍嘅作品唔少都好有創意,例如其中一個係指住天空嘅小孩塑像,寓意社會「天天向上」。另一個名為「演講亭」嘅作品,就容許市民入去拍攝錄像,然後喺新大樓對出廣場播放。須知新大樓就喺正新政府總部側邊,如果呢個設計最後獲選,將來定會成為示威者反對同揶揄政府嘅新武器。