29/07/2010

播放本新聞相關短片

政情:李少光戴老花鏡驗偽證

保安局局長李少光出訪馬來西亞同印尼,尋日拜會馬來西亞皇家關稅局總監拿督斯里依布拉欣,亦參觀咗吉隆坡國際機場,睇吓入境及海關前線人員點樣管理檢查站,之後特別了解佢哋檢驗偽證嘅做法(圖),原來當地發現嘅偽證仿真度極高,李少光要戴老花眼鏡先至睇得清楚。

李少光話,鑑於人流同貨運量急劇增加,全球已成為一個世界村,香港同馬來西亞雙方已做好準備,喺未來加強合作,促進效率。除此之外,佢都好關注毒品問題,尋日同拿督見面時,仲特別提到印度未將「K仔」列為危險藥物,促請各國繼續努力打擊毒品。完成咗馬來西亞嘅訪問後,李少光傍晚已經轉飛印尼繼續訪問,聽日先結束行程返港。

為應屆會考生打打氣,請瀏覽on.cc東方互動《放榜無限分2010》專輯