肥亨越洋接受我哋訪問時話，佢同誠哥早喺七十年代已經相識，今次係抱住終身學習嘅態度入赫斯基能源，就好似為香港大學擔任經濟金融學院榮譽教授一樣。雖然佢從未做過資源公司，但相信加入赫斯基能源可以學到更多，而且業務唔喺香港，瓜田李下嘅機會減到最少，情況同出任中策主力進軍台灣保險業務、以及做業務集中喺內地嘅華潤置地非執董相似。

肥亨又話，離開官場呢兩年，有好多公司斟佢加盟，但佢已經小心為上，唔熟悉嘅公司一律唔揀，費事踩地雷。肥亨仲講笑咁話，年輕時任職大通銀行時首次見誠哥，當時自己只係G仔一個；七十年代入熊谷組，誠哥係佢哋嘅客戶，畀樓佢哋起，兩人開始有接觸，所以大家相交二十幾年，如果要勾結，都勾結咗好耐啦！至於中策收購台灣南山人壽阻力重重，肥亨呢個時候加盟赫斯基能源會唔會惹嚟揣測，肥亨斬釘截鐵咁話，佢同人稱「柯大俠」嘅中策副主席兼行政總裁柯清輝係最佳拍檔，佢唔會離開中策！