做過天津市市長嘅戴相龍專程來港，佢有四年未踏足香港，尋日午餐會演講後，就搭下晝四點幾飛機返京，喺香港逗留唔夠二十四小時。點解咁熱誠撐中總？中總會長蔡冠深自爆，佢同戴相龍係多年好友。至於晚宴嘅焦點，就集中喺楊利偉、費俊龍、聶海勝等六位太空人身上。楊利偉透露，今趟係專程來港出席中總活動，佢哋會喺香港逗留幾日至走，中總都好有心思，送咗每位太空人着太空裝嘅相畀佢哋作紀念品。

前中總會長曾憲梓同霍震寰一家、副會長「褲王」楊釗、小提琴家姚珏都有出席晚宴。霍震寰嘅囝囝啟文、啟中同埋老婆陳琪琪，尋晚難得攜手現身，但囡囡思緯就冇出現嘞。

霍震寰話呢兩個月好忙，遲啲會去內蒙古，跟住同培華基金會出訪，所以暑假冇時間一家去旅行，希望九月可以抽空帶仔女去上海睇世博。