本文重點
樓市年來屢創新高，舊年港區省級政協委員聯誼會斥資四千幾萬元，喺灣仔海外信託銀行大廈購入一整層七千呎寫字樓做新會址，尋日入得伙，仲舉行揭牌儀式。主席戴德豐透露，短短一年間，呢個會址已經升值到五千幾萬元，「唔覺意」幫聯誼會帳面勁賺一千萬元，但佢話：「升幾多都冇用吖，我哋都唔會賣嘅。」
籌得五千萬元自置物業
成立四年嘅省政協聯誼會，成員有一千七百人，初期喺灣仔華潤大廈租單位做聯絡點，舊年已經火速籌得五千萬元自置物業。睇番新會址門口嘅捐款芳名錄，前全國政協常委張永珍捐咗一千萬元，信和置業主席黃志祥捐五百萬元，「霍老」霍英東兒子霍震宇捐一百二十萬元，新世界發展董事總經理鄭家純、全國政協常委洪祖杭同前全國人大常委曾憲梓兒子曾智明等各捐一百萬元。
聯誼會新會址有個可以容納三百人嘅大禮堂，仲有擺放咗一張乒乓波枱嘅活動室同茶水房，另一邊係辦公地方，有會議室、兩間辦公房同幾張員工辦公桌，裝修實而不華。