29/07/2010

播放本新聞相關短片

政情:立會議題多暑假凍過水

立法會七月中開完本立法年度最後一次大會後,原則上已經開始放暑假,可惜城中近排日日有新事,八達通侵犯百萬市民私隱,同大浪西灣天然美景疑遭富豪破壞等,都引起公憤,立法會議員唔敢怠慢,拿拿聲加開特別事務委員會跟進,呢個月已經開咗最少八個事務委員會跟進。呢幾個委員會有唔少身份重疊嘅成員,好似白鴿黨嘅鐵頭仁、涂謹申,工聯會嘅王國興,甚至「新界王」劉皇發等都係腳踏幾個會,呢個盛夏,佢哋恐怕要睇人放暑假囉!

立法會前日加開會討論八達通,尋日又加開會討論大浪西灣,議題都備受關注。有議員呻過去暑假都可以抽時間離港度假,趁機抖吓,今年就冇咁開心,淨係七月,都有多個委員會要加開特別委員會,跟進公眾關注、唔等得復會嘅事宜。好似發展事務委員會咁,尋日同環境事務委員會開咗個聯合特別會議,早前又要傾市區重建策略,近排連場暴雨,啲議員驚遲吓分分鐘要開樹木保育嘅特別會議。

去旅行走唔出廣東省

其他仲有房屋委員會已經因為天匯事件開咗兩次會;科技事務委員會又要跟進免費電視牌照嘅工作;甚至保安事務委員會都要跟進監警會嘅工作。委員會爭相OT開會,身兼幾個委員會嘅議員梗係走唔甩啦,白鴿黨主席鐵頭仁身兼發展、保安同財經事務委員會嘅成員,呢三個委員會七月之內已經開咗四次特別會,鐵頭仁如果全數出席,都好難放到假。

發叔亦忙到暈,事關佢係發展事務委員會主席,同時身兼保安事務委員會嘅成員;白鴿黨嘅涂謹申、甘乃威都係發展同財經事務委員會嘅成員,尋日所見,阿涂開會時聲都沙埋;至於阿王OT開會之外,仲要日日同苦主搵八達通、港鐵等交涉,佢已經預咗呢個暑假勁縮水,仲話即使去旅行,睇怕都走唔出廣東省。

為應屆會考生打打氣,請瀏覽on.cc東方互動《放榜無限分2010》專輯