想當日，阿珍因為團友購物「唔理想」，惡形惡相將全團鬧足七分鐘，又話唔畀食唔畀住，又話今世唔還下世都要還，卒之被網友封做「母夜叉」。佢尋日首次公開露面交代事件，就好似變咗另一個人，陰聲細氣，想喊咁口。佢承認當日講咗令人唔舒服嘅話，要向香港市民同內地同胞道歉。

呢單惡導遊鬧團友事件已經臭名遠揚，令香港旅遊界蒙羞。家陣阿珍企出嚟面對，遲就遲咗啲，但都值得鼓勵嘅。之不過，如果以為事件主角講兩聲對唔住，就可以挽回旅遊業嘅信譽，咁就太傻太天真嘞。零團費、負團費等制度性問題一日唔解決，旅遊業亂象仍會存在，搞掂一個阿珍，又會有更多阿珍出現。

因乜事咁講呀？一字咁淺，阿珍發爛渣係因為佢帶嘅係購物團，六百零蚊團費包食包住玩幾日，旅行社同導遊都靠團友購物收回佣賺錢。導遊就要不擇手段令團友購物，氹得到就氹，氹唔到就鬧，話之你激到心臟病發作啦。有啲導遊更黑心，串通黑店宰客，將團友斬到一頸血。叮！

既然零團費係亂象嘅根源，政府點解唔理呀？高官話，香港推行自由市場經濟，政府唔可以干預旅行社嘅價格。但咁唔等於政府應該翹埋雙手乜都唔做。

講到呢度，有人會問，由邊個部門監管呀？問得好！當局對旅遊業嘅管理不嬲七國咁亂，部門各自為政，旅遊事務署係政府部門，但只負責旅遊設施同政策；旅發局係公營機構，但只負責宣傳推廣，反而由屬於業界自律組織嘅旅遊業議會負責監管，邊個聽佢支笛呀？太一叮諗唔明，連澳門咁細地方，政府都設有一個旅遊局，香港點解唔可以有一個統籌旅遊業監管嘅政府部門？

近期一連串趕客事件，已令香港旅遊業受咗內傷，連一向撐香港嘅國家旅遊局早前都發出旅遊服務警示，提醒訪港旅客小心購物陷阱，直情摑咗港府一巴掌。

阿爺唔撐，嚇到當局慌失失，旅發局主席田北俊急急腳赴京溝通。國家旅遊局高官就話，佢哋唔係勸旅客唔好訪港，只係希望內地消費者提高警覺，仲話激死國手同女導遊鬧團友等只係個別事件，唔會影響內地居民赴港旅遊嘅信心咁話。

如果政府高官唔係廢廢地，一定聽得出呢啲只係客氣話。講真，如果再任由旅遊業亂象惡化，內地旅客終有一日會集體拒絕訪港，到時睇吓班高官仲好意思吹噓香港係旅遊之都吖嗱。叮！