28/07/2010

播放本新聞相關短片

政情:波波最愛中總家常菜

立法會會計界議員「波波」陳茂波係潮安人,平時飲食以清淡為主,好鍾意去中環干諾道中嘅中華總商會會所食家常菜。波波透露,當年入會只係一次過繳交一萬蚊永久會費,以後就毋須再交月費,而且菜式價錢合理,一餐飯平均每人百幾蚊,咁嘅價錢又要坐得舒服嘅地方,喺中環確係好難搵到。

日前波波又去開餐,見佢點咗八寶燉冬瓜盅、中斑兩味、鮮百合蜜豆帶子蝦球、法海蒲團同當紅炸子雞,仲有甜品生磨蛋白杏仁茶。中總嘅招牌當紅炸子雞係波波嘅至愛,佢大讚炸雞皮脆肉嫩,雞髀肉更加滑到冇得頂,係佢食雞必食嘅部位。多味菜式之中,以「法海蒲團」最具特色,以薄到透光嘅腐皮將多款齋菜包裹成僧人打坐嘅蒲團形狀,相當的骰。

波波話,平時同家人去中總食飯會比較簡單,例如叫個土魷蒸肉餅、鎮江骨、咕嚕肉或蒸條桂魚。

為應屆會考生打打氣,請瀏覽on.cc 東方互動《放榜無限分2010》專輯