暑假好多人出埠避暑，震雄集團主席蔣震就話留喺香港避暑最好，原來佢位於大埔康樂園嘅大宅，有一個長達二十米嘅私家游泳池，佢每晚食完飯抖一陣後，例必落水游番四百米至瞓覺，既可消暑又可當做運動養生。
近排股市升升跌跌，問到蔣震有乜投資心得，佢透露自己一世人只會買兩隻股票，一隻係大笨象滙豐控股，另一隻就當然係旗下嘅震雄集團啦！佢仲話，大笨象跌到四十幾蚊時，佢入咗唔少，依家大笨象公布業績在即，股價又節節上升，蔣震肯定收穫甚豐啦。
至於震雄，佢就透露一有錢就入貨，直情當係儲錢咁，但佢都提醒自己因住嚟買，唔可以買太多。點解？一句講晒：「如果我買晒，咁不如唔好上市啦！」
