本文重點
立法會審議緊停車熄匙立法草案，一眾立法會議員日前先捉咗環境局局長邱騰華落區考察民情，試搭「蒸籠」的士同小巴，結果搞到大汗疊細汗。呢頭啱啱焗完桑拿，嗰頭已經爆出好多不滿，事關業界質疑邱騰華點解揀桑拿嚟焗，立法會議員又覺得去嘅地區唔夠，未能掌握全豹，所以想捉邱騰華焗多次，呢次邱騰華想唔焗到瘦都唔得啦！
所需時間更長
邱騰華早前落咗港九共五個地點試搭「熱狗巴」同「蒸籠的」，車內氣溫高達四十度，佢焗完之後都疲態盡現。點知新界的士業界不滿邱騰華「厚此薄彼」，只焗紅桑拿，懶理綠蒸籠，故紛紛邀請佢嚟新界encore。街工議員梁耀忠同工聯會王國興亦唔執輸，分別列咗五個同三個必到地點，希望邱騰華可以實地感受吓。
驟眼睇，阿忠同阿王列嘅地點有啲相同，包括落馬洲、上水同深圳灣，專搵一啲過境線同邊境地帶，嗰度嘅車輛面對嘅係一旦關口擠塞，就會郁都郁唔到，邱騰華去體驗呢款桑拿，會唔會時間最長㗎？停車熄匙法案委員會主席余若薇就話，仲未同邱騰華嗰邊夾好時間，不過上次視察五個地點已超時兩粒鐘，睇怕邱騰華要去晒所有「必到」景點係冇可能嘅。