八達通亂咁賣香港人資料，搞到全城共㷫，個人資料私隱專員公署急急介入事件，專員吳斌日前搞咗個公開聆訊，尋日又上立法會。不過，有口痕友就話，吳斌尋日上立法會嘅形象勁似酒樓部長，事關佢一身黑色西裝，打黑色煲呔、插白色袋巾，頭髮又向後蠟到立立令，驟眼睇真係有部長feel喎！
呢個禮拜六就任滿嘅吳斌近排忽然高調，除咗循法律途徑搵審計署署長算帳外，仲瞓晒身介入八達通事件，臨尾跟單大嘢，吳斌梗係跟到貼。尋日立法會討論件事，佢以私隱專員身份上去解畫，如無意外，呢次應該係佢最後一次以呢個身份出席立法會。或者係咁，吳斌特別隆重其事，一身黑西裝襯黑煲呔，只不過，呢個精心配搭就call起好多集體回憶，譬如酒樓部長……
吳斌把握呢次機會講述佢哋聆訊嘅發現，但都被揭發公署過去已經收過市民嘅投訴，但就冇任何跟進，質疑公署調查不力。吳斌梗係唔認啦，仲自嘲自己係冇牙老虎，「棚牙畀啲立法會議員剝晒」。