下屆立法會選舉變化多多，有「金牌莊家」稱號嘅金融服務界立法會議員詹培忠都被傳計劃唔玩，不過消息話金勞詹未有「欽點」立法會接班人。點解？佢話自己冇咁偉大，唔會幫人抬轎喎。
○四年金融服務界議席共有五人角逐，除咗金勞詹外，仲有競逐連任嘅胡經昌、全國政協委員張華峰、富貴黨嘅馮家彬，以及當時係港進聯成員嘅馮志堅；○八年金勞詹喺冇對手下自動當選。金勞詹一退，冇人揸莊，張華峰四人有賭未為輸，可能會再落場爭奪金融服務界議席都未定。
好笑嘅係，金勞詹謀退，但就對佢「徒弟」、旅遊界議員謝偉俊（Paul）嘅前景好上心，佢話經濟動力胡兆英虎視眈眈，阿Paul一二年連任未言樂觀，但都唔係話冇橋，至少有兩條。第一係阿Paul上屆攞到三百二十多張票，金勞詹打算幫佢游說多一百五十間公司登記做選民；第二就係同阿爺講數，勸退其他對手。嘩！金勞詹唔通想轉做幕後玩家？