本文重點
近期城中兩件事令人好激氣，先係導遊阿珍辱罵內地遊客，搞到香港畀人唱衰；之後又有八達通擅自賣咗二百幾萬港人資料賺錢，兩件事嘅關鍵人物導遊「阿珍」李巧珍同八達通CEO「阿鏵」陳碧鏵尋日不約而同出招，希望自救。佢哋兩個都衰喺把口上，一個講狠話鬧人，一個就講大話呃人，尋日嘅表現又點呢？阿珍眼濕濕訴苦，阿鏵就一副女強人嘅款冷靜狡辯，佢哋救唔救到自己仲要再睇，但係職場中人可以從中學到好多嘢！
背景懸殊 人工差大截
呢兩個焦點女人嘅背景好懸殊，阿珍雖然識講雙語，但廣東話講得好麻麻，收入更係浮動一族，據講同業計埋佣金可以由萬零蚊至幾萬蚊；阿鏵就中英文流暢，做得上市公司轄下企業嘅CEO，年薪動輒以百萬計。呢兩個喺命運軌迹上好難重疊嘅女人，尋日竟然撞埋同一日出招，實在咁啱都冇咁蹺。
尋日朝早十點九，阿鏵首先去立法會受靶，佢一襲黑色行政人員套裝，即使惹嚟全城狂鬧都面不改容，女強人味十足。最好嘢係捱鬧近三小時，都冇一句激動言詞，可惜佢嘅冷靜表現冚唔住兩個禮拜前講大話嘅事實，即使再次道歉，都係換嚟「醜陋」、「幾時辭職」同「問責下台」等更致命嘅狙擊。下晝四點鐘，阿珍接棒出場，雖然都係黑色戰衣，但阿珍未講嘢已經眼紅紅，開腔之後更一再低聲下氣向港人同內地同胞道歉，形象同短片中嘅潑辣好唔同，言辭間，佢仲透露自己係兩女嘅單親媽媽。
兩個女人家吓都陷入好狼狽嘅境地，社會恨意重重，佢哋嘅前途更加疑慮重重，事後，阿鏵以女強人姿態繼續捱轟，阿珍嘅小女人口供亦惹嚟遊客不滿，睇嚟，佢哋自救招數雖然唔同，效果就一樣麻麻。不過，有口痕友話，港人一向鍾意鋤強扶弱，呢個情況會唔會喺阿珍同阿鏵嘅事件中反映呢？日內就可以揭盅。