自從政府提出呢項擾民政策後，交通運輸業界激烈反彈，狂批當局擾民，有業界人士要求邱騰華去的士站坐入車廂排隊，試吓高溫天氣停車熄匙等候嘅滋味。邱騰華開頭扭扭擰擰唔應承，直到今個月初，有位八十幾歲嘅小巴司機因為響應政府呼籲停車熄匙，當場焗暈，送院不治。輿論嘩然，邱騰華淪為箭豬，為咗挽回人心，惟有做番場大龍鳳。

話時話，邱局長都算夠運，揀到個好日子，如果揀早幾日就慘情嘞。上周天文台發出酷熱警告，架車熄咗冷氣喺烈日下暴曬，車廂等同大蒸籠，邱局長身嬌肉貴，點頂得順？好彩早兩日落咗幾場大雨，酷熱警告唔使不停發出，氣溫雖然仲係比較高，但點都冇上周咁難頂。

不過，停車熄匙一樣好大鑊。嗱，班高官同議員上咗一架冇開冷氣嘅雙層巴士，坐咗一陣就周身大汗。梗係啦，車廂內溫度超過四十度，唔焗壞人至奇。熄匙輪候嘅的士更係似足桑拿房，車內溫度四十一度，坐入去唔夠幾分鐘就要嗌救命。

班高官平日坐喺冷氣房閉門造車，又點知停車熄匙嘅滋味呀？依家應該明白，停車熄匙係擾民惡法，危害司機同乘客嘅健康同安全。如果當局仲係一意孤行，嗰位八旬長者絕對唔會係最後一個犧牲者。叮！

講出嚟可能冇人信，停車熄匙焗死仲慘過交通意外撞死。因為職業司機唔好彩撞車死亡，仲有保險公司賠償，但係如果因為停車熄匙焗死，咁就叫天不應、叫地不靈嘞。原來職業司機唔受現行《職業安全及健康條例》保障，所以日後立法強制停車熄匙之後，司機如果喺酷熱環境工作出事，僱主唔使負責任。

叮！停車熄匙條例直情係一個陷阱，會令職業司機死無葬身之地！難怪尋日有大批業界人士去現場抗議，要邱騰華落台啦。難為邱騰華仲吹水唔抹嘴，話有七成人支持政府建議喎，呃鬼食豆腐咩！

邱騰華實地視察後，先至死死氣話，政府會重新檢討停車熄匙豁免範圍，尤其酷熱天氣輪候應該豁免。之不過，法例仲未出爐，就左一個豁免，右一個豁免，搞到體無完膚，既然係咁，仲要呢條擾民法例做乜嘢呀？不如快快收皮罷啦。叮！