Anina瞓身創業，也為她帶來一段美滿婚姻。○三年，她要找場地舉行宣傳活動，朋友介紹她到何乃斌開設的法國餐廳參觀，何乃斌對她一見傾心，隨即展開追求：「佢成日借頭借路約我食飯，又特登學摺紙，每日摺個心畀我，入面仲寫咗啲令我cheer up嘅說話，幾個月後，佢送咗個木盒畀我，叫我用嚟裝起啲心。」她甜絲絲說。
二人拍拖九個月便在○五年閃電結婚，她和老公都是沒脾氣的人，結婚幾年甚少吵架：「佢真係好明白我，有時我喺生意上遇到唔開心，唔使我出聲，佢都已經知道係乜事。」她閒時最喜歡為老公下廚，飯後一起看DVD已覺很浪漫。
去年底，Anina誕下兒子Lawrence，她說起便甜到入心：「我依家返工都盡量返早啲、放早啲，可以多啲時間陪佢玩。佢依家學緊行，識講baba、mama啦！」