百仁基金上月初順利舉行換屆儀式，由菁英會創會主席Jaime施榮忻接棒出任主席。至於菁英會換屆就職典禮亦將喺八月六號舉行，屆時「燕之家」創辦人白富鴻會正式由Jaime手中取過帥印，並邀得中聯辦副主任王志民到場主禮見證。
Jamie早前就邀請新主席白富鴻同副主席洪為民品嘗福建家鄉菜，預祝順利交接，而當晚嘅家鄉菜最特別係由Jamie媽咪親自下廚，炮製「豆豉煎馬友」同「炆大鱔煲」等拿手菜式，簡直係溫暖牌家鄉菜。
「豆豉煎馬友」選用嘅冰鮮馬友魚約斤幾重，六十至七十蚊一條，加埋豆豉、葱等調味料香煎。至於「炆大鱔煲」就將鱔加入大葱同豬腩肉炆兩粒幾鐘，食時再用電磁爐㷫住，兩味菜都色香味俱全。Jamie話呢兩味菜佢由細食到大，媽咪嘅愛心同獨有嘅口味，外邊嘅食肆肯定食唔到，所以佢班兄弟真係有口福嘞。
呢個福建家鄉菜聚會喺Jamie位於灣仔嘅「老佛爺」酒窖內舉行，媽咪嘅兩味拿手菜加上幾味到會，就變成一餐家常便飯，當然唔少得開番幾支葡萄酒飲番杯開心吓啦！