本文重點
轉軚支持政改一役，令白鴿黨成為眾矢之的，遭公社兩黨狂轟「賣港、賣黨、賣民主」，而社民連更深明「時間會沖淡一切」嘅定理，面對二○一二年立法會改選嘅競爭，竟然度出「陰招」添！
社民連創黨主席黃毓民尋日同傳媒茶敍時話，雖然政改一役充分凸顯咗白鴿黨嘅陰暗面，但相信時間可能會沖淡一切，依家唾棄白鴿黨嘅選民兩年後又可能會唔記得呢啲「往事」，所以社民連嚟緊會繼續把握機會「出招」，喺議會內外挖白鴿黨嘅瘡疤，等市民冇原諒同忘記佢哋嘅機會。
實際上，睇番啱啱上個禮拜嘅政制事務委員會，社民連的確不斷咬住白鴿黨唔放，單係毓民就寸爆支持方案嘅白鴿黨冇資格同大家討論方案嘅細節。
隨時適得其反
咁做都係睇政治利益啫，社民連都係想令白鴿黨翻身無期，實行踩白鴿黨益自己，即係將白鴿黨流失嘅選票轉袋落自己個袋。之不過，若果社民連嗰三幅被講足兩年，市民聽得多會覺得麻木、煩厭，甚至反感，到頭嚟「陰招」不得逞，搶唔到白鴿黨嘅票，社民連仲可能流失自己嘅支持者添！條數係咪咁計呢？
面對社民連嘅連番狙擊，白鴿黨副主席劉慧卿話乜都未驚過，會繼續做好自己嘅嘢喎！