日前喺優才諮委會成員羅寶文嘅新書發布會上，見到嚟撐場嘅海洋公園保育基金主席Judy陳晴，佢哋因愛狗而認識，但喺Judy心目中嘅至愛相信非大熊貓莫屬。
Judy喺三年前領養咗四川臥龍一隻熊貓女「晴晴」之後，就愈嚟愈鍾意國寶大熊貓，當日仲見佢戴咗隻熊貓閃石腕錶，同胸前條熊貓頸鏈襯到絕。隻靚錶喺邊度買㗎？佢笑謂係朋友送嘅，所以唔知價錢或牌子，只知喺意大利特別訂製。佢又話舊年寫嗰本有關佢同囡囡晴晴嘅《兩晴相悅》勁好賣，首版五千本賣完之後加印咗第二版，所以朋友特別訂製咗呢隻咁特別嘅腕錶鼓勵佢。至於係邊位朋友，佢甜笑話唔方便講喎！
嗰隻熊貓錶設計好特別，錶面用黑白閃石砌出熊貓肥嘟嘟嘅可愛樣，想睇時間就要㩒右邊嘅掣，㩒一吓會有紅色LCD燈以數字顯示時間，再㩒多吓就顯示日期，啱晒追求時尚嘅潮人。
除咗Judy外，當日「最美麗港姐」朱玲玲都代老公去撐姪女羅寶文，其他嘉賓仲有沙田區議員龐愛蘭、名媛趙曾學韞、保良局主席呂鈞堯等，羅寶文嘅社交手腕真係唔簡單！