本文重點
早前一場黑色暴雨，導致大埔碗窰沙埔仔村村毀人亡，村民歸咎渠務署嘅河道工程，但渠務署署長劉家強就死口唔認。劉家強解釋時好多嘢都唔清唔楚，白鴿黨嘅立法會議員黃成智索性要求佢去立法會解畫，而發展事務委員會主席劉皇發見事件嚴重，即刻批准喺今日嘅委員會加插「防洪及應變措施」議程，重點討論今次水浸問題。咁即係直接捉劉家強受靶啦！
斥太遲現場視察
劉家強對沙埔仔村嘅水浸問題一直都扭扭擰擰，開始時話完全唔關事，隔幾日後落村做騷，畀班村民鬧鑊甘，喺風頭火勢下，佢先向村民道歉，尋日出席區議會時又改口話可能同工程有關係。真係唔知佢邊句真、邊句假！
發叔話沙埔仔村嘅慘劇係緊急事件，值得大家討論，加上劉家強喺大水浸事發後三日、即前日先去沙埔仔村視察，仲要只係睇得半粒鐘，實在反應太慢，一定要劉家強講清講楚先放佢走咁話！發叔又話天災呢啲嘢好可能喺短時間內重演，一定要畀啲壓力政府，令佢哋正視問題。