極地相冇申請版權

李博士今年出咗兩本書，主要為佢過往二十年、多達十八次嘅極地旅程作總結。佢慨嘆一路寫時都覺得好沉重，事關睇住個環境惡化，自己好似有心無力咁。佢更把握機會向一眾在場嘅家長說教，話依家小學教育嘅教科書，對環保嘅論述都足夠，只係依家啲家長唔夠配合，禮拜日只會帶小朋友去玩、去飲茶，「咁多時間，不如去大自然睇吓好過啦！」

佢又話自己咁多年嚟喺極地影返嚟嘅相都冇申請版權，希望畀一眾學生用嚟做功課。不過礙於體能問題，佢就唔會再去極地嘞，仲話要正式交棒畀一班有體力又有國際視野嘅後生仔喎！