喺外國留學返港嘅Ronald，早就開始用facebook同網民溝通，之前佢做南區區議員直到最近升呢做特首辦特助之後，佢都有用facebook同各界友好聯絡，仲不時寓工作於娛樂，向各界分享工作點滴同個人感受，可見屬於「80後」嘅Ronald真係唔同啲。

前日佢隨考察團到四川探國寶大熊貓，都不時將沿途所見所聞嘅第一手資料放上facebook，畀各方網民留言回應。需知道喺內地唔可以直接上到facebook，唔少心水清嘅網民都覺得好奇怪，點解Ronald可以突破重重關卡上到facebook呢？

封特首辦「新媒體主管」

向Ronald求證過，facebook上嘅資訊確實係佢放上網嘅，而佢亦唔係精通翻牆術。原來只不過係身為特區政府官員嘅佢，可以透過特區政府嘅內聯網上網。換言之，即係變相翻牆，仲要係走官方捷徑嚟突破封鎖，即係攞正牌走捷徑，內地網民就冇呢個福利喇！

不過，話分兩頭，Ronald放上facebook嘅都只係同工作有關嘅嘢，出發點只係增加特首辦嘅透明度，都算得上係情有可原嘅！

咁識得善用資訊科技，唔怪之得話遲啲特首辦將成立嘅一個官方facebook帳戶，都會搵被封為特首辦「新媒體主管」嘅Ronald負責具體製作啦，事關佢係特首辦裏面最熟悉用乜嘢網上渠道同年輕人溝通嗰個，靠其他人肯定又搞到倒瀉籮蟹。