茵茵現時仍在廣華醫院兒童深切治療病房留醫，主診醫生吳國強表示，茵茵病情十分穩定，該院亦辦妥安排茵茵前往台灣的事前準備，隨時可赴台就醫，但仍需解決一路上救援安排，「始終茵茵仲好細，身體又好脆弱，唔係隨便就可以送佢去台灣，一定要喺萬無一失嘅情況下，先可以送佢去！」

海外讀者亦寄上祝福

茵茵任職文員的母親每天為着「撐起頭家」而勞碌，而父親近日返內地辦理赴台證件，婆婆頓成「臨時替工」照顧茵茵。看到久別的茵茵，蔡婆婆一時感觸，「茵茵依家要插腸喉餵食，但佢成日去拉條喉，搞到又要插番，插完又要等四個鐘之後先食得嘢，真陰功！」蔡婆婆說時雙眼通紅。

另一方面，各界繼續為茵茵打氣，八旬長者徐婆婆捐出一千元生果金支持茵茵對抗病魔，「我患過腸癌，六年前又跌斷腳要坐輪椅，好明白病人有幾慘！捐錢幫到茵茵，我好開心！」海外讀者亦遙遙寄上祝福，加拿大的Jennifer為茵茵不幸難過，但相信讀者點滴捐助足以扭轉不幸，越洋寄上一百元加幣支票外，更附上祝福信，「祝茵茵早日康復，快高長大，他日成為可造之材，貢獻社會！」

就讀者無私的捐助，蔡太坦言無限感動，「估唔到海外讀者都會盡力幫手，BB真係好幸福，世界冇離棄過佢！我哋一定會教好佢，唔好辜負大家關心！」

太陽報愛心基金與東方日報慈善基金正全力跟進茵茵赴台的治療安排，並將善長捐款作為茵茵日後治療費之用。讀者如有查詢，請致電3600 9988與本報記者聯絡。

捐款編號：911933

愛心承諾

林女士：我有兩個BB，好明白父母感受！希望茵茵健健康康，茵茵媽媽要撐住呀！

何女士：我個孫女廿個月大，喺蘇州住！每次傾電話知道佢嘅趣事，就笑到合唔埋嘴！希望茵茵快啲好番，帶畀家人歡樂！

廖先生：啱啱喺內地做完嘢返香港，第一件事就係捐錢！雖然只係幾百蚊，都係小小心意，希望幫到佢啦！

‧查詢電話：1,203個

‧累積捐款：$1,397,146.7