按計劃，報讀IVE文憑或者高級文憑嘅學生分兩階段註冊入學，七月二十七日先安排原校學生註冊，八月四日安排原校唔夠分嘅人同埋會考生報讀。咁安排本來唔會有問題，弊就弊在校方唔知抽起邊條筋，居然宣布「先到先註冊」。於是乎，原校學生怕讀唔到合適課程，更擔心畀會考生搶學位，所以無論夠唔夠分，都第一時間撲去搶頭位。註冊二十七日先至開始，但二十四日晚各分校門外已出現長龍，排隊嘅唔止學生本人，連佢哋嘅父母都嚟埋，有啲仲一家三代輪流排隊，甚至連孕婦都出動！

呢幾日驕陽似火，天文台發出酷熱警告，大熱天時喺空曠地方排隊，直情等同曬鹹魚。天公又偏偏不作美，耐不耐整番場驟雨，排隊人士又變咗落湯雞。排咗兩日，好多人都頂唔順病咗。

叮！咁多人日曬雨淋，校方竟然連少少同情心都冇。沙田分校有二百幾人坐喺公路邊排隊，嗰度車來車往，空氣污染嚴重。佢哋要求開放校園，畀大家入去輪候，校方硬係唔肯，話之你曬到燶啦。

有分校本來已派職員為排隊人士登記，但又話人一走開就會喪失報名資格，學生惟有頂硬上。難怪好多人媽媽聲，鬧校方冇人性。

話時話，今年點解咁多人報讀IVE嘅？事關今年係最後一次中學會考，八萬幾個末代會考生只有三萬五千人有機會升讀中六，重讀中五呢條路已經封死咗。加上部分IVE課程可以同專上課程銜接，所以今年學位特別搶手。

班高官如果係醒目嘅，一早就應該未雨綢繆，喺推動新高中學制嘅同時，增撥資源擴大IVE課程收生。可惜佢哋根本冇全盤計劃，只識得頭痛醫頭、腳痛醫腳。對現時嘅亂象，當局實在難辭其咎。

講開又講，末代會考生嘅出路絕對唔係小事。有調查發現，四成七會考生感到壓力偏大，其中唔少人仲快爆煲。呢家嘢唔講得笑㗎，先排就有個十七歲會考生跳樓輕生。

唉，當局係威係勢推出一套套教改大計，到頭嚟都係擾民政策，可憐學生做咗白老鼠不特止，仲要日曬雨淋捱到病。不如叫班高官去IVE排番幾日隊，睇吓佢哋頂唔頂得順？