工聯會消息指新東地區班兄弟已經做晒心理準備，一二年立法會選舉由葉偉明抬住工聯會支旗參選，唔會再為建仔「抬轎」助選，而明年底嘅區議會選舉，就係佢轉入直選路嘅切線位，工聯會將會安排佢為新東地區競逐連任嘅工聯會區議員助選，變相為一二年提早落區拉票。

有工聯會地區人士話年初公社兩黨策動五區補選，若富貴黨田北俊或新論壇龐愛蘭能夠落場硬撼「長毛」梁國雄，必定強勢再起，對葉偉明一二年選情構成威脅，但最終「阿爺」卻下令杯葛補選，令田、龐兩人失卻一次捲土重來嘅機會，加上政改方案出乎意料咁獲通過，新界有機會加議席，令葉偉明轉戰直選嘅勝算大增。

但潘佩璆經過兩年「試刀」，行情仍然不被看好。佢喺醫管局做精神科顧問醫生，職務繁重，加上議會工作非輕，實在難以再揼時間落區掘票。再者，佢性格低調內斂，對於求曝光、講噱頭嘅香港政壇就會相對蝕底，好難突圍，上年暑假，港大民意研究計劃公布議會新丁調查，佢成為最低知名度嘅議員之一，就係一個警號。所以，佢出戰港島嘅可能性已經愈嚟愈細。