本文重點
早前盛傳立法會會計界議員「波波」陳茂波同疑似特首候選人、行政會議召集人CY梁振英關係密切,更可能係CY埋班嘅其中一員,隔咗冇耐,佢又公開否認,話一切只屬傳聞。以為佢同CY劃清界線啦,點知轉過背竟然又走去撐CY場喎,都唔知佢搞邊科!
猶抱琵琶半遮面
CY本新書叫《假如是你的子女》,唔好誤會,唔係講教仔,文章主要講貧窮同香港新一代出路嘅問題,尋日就喺書展搞簽名會兼講座,都有好多名人嚟捧場。婦女事務委員會主席高靜芝買埋書叫CY簽名,話係CY嘅忠實讀者。被問到特首人選,高靜芝仲當住CY面,話支持有承擔、有能力同關心香港嘅人。唔知CY覺得自己中邊瓣呢?
後來見到波波都趕到嚟,佢大讚CY嘅文章夠潑辣,有深度,睇完要思考一陣先知講乜。早前先話過同CY冇乜關係,波波竟然連CY嘅文章都睇得咁通透,話同CY唔熟,邊個會信?以波波嘅態度,似係猶抱琵琶半遮面多啲喎!