有次見佢戴住價值六萬蚊嘅Bertolucci玫瑰金鑽石錶，傾開先知原來大部分靚錶都係老公送畀佢嘅。佢話平時行街買衫買鞋從來唔嫌嘥時間，但係佢好少行錶舖。佢甜絲絲咁話，老公對手錶一向好有研究，鍾情經典款式，每次買開錶實會買多隻送畀佢，咁就可以夾埋做情侶錶啦！所以佢自己唔多買錶。

至於當日佢戴住嗰隻Bertolucci，係有日行街見到幾啱眼緣，所以諗都唔諗就扑錘買咗。源自瑞士嘅Bertolucci女裝錶，專為女士配搭時裝而設計，即使同鮮艷奪目嘅時裝配搭，都可以戴出自家風格。

尋日喺書展又撞到Sophia，問佢暑假去邊度玩，佢好認真咁話，暑假一定要叉電㗎！遲啲全家會去美國洛杉磯探朋友兼搵嘢食。