莫教授喺講座中透露，華叔患病嘅消息備受各方重視，九名內地專家年初主動來港商討治療華叔嘅方法。究竟呢班專家係何許人呢？莫教授不欲多講，只係話：「九個人嚟香港，六個同我開會。我一早識佢哋㗎，冇必要提對方身份吖！」華叔亦只係話：「冇特別吖，都係嗰啲人啦！」

講到調理身體，華叔就健談好多。佢話平日服用冬蟲草同雲芝，仲會將蘋果、薯仔同紅蘿蔔榨汁飲，加上好聽醫生話，所以精神唔錯。

華叔話自己嘅癌症指數十八度，但指數唔能夠反映全部狀況。佢又好輕鬆咁話，唔會特別問病情好定唔好，日常生活方面變化唔大，照樣會去遊行，只係唔會行晒全程。大家提佢唔好勞氣，佢笑住話：「生活唔可以好似一池死水，要有啲火花！」佢仲提到自己抗癌都冇戒甜，繼續保留生活樂趣，每朝飲奶茶仍然會加三匙糖，瞓前仲食幾粒朱古力添！