喺內訌陰霾籠罩下，社民連尋日舉行特別會員大會，就行政委員空缺進行補選，由「維園阿哥」任亮憲撼未夠二十歲嘅「社民連小辣椒」嚴敏華，最後任亮憲以九十四票險勝得到七十三票嘅小辣椒，做咗行委。
對決嘅兩位對手都係突然爆出嚟嘅，例如維園阿哥因成功活化城市論壇而人氣急升，小辣椒就試過痛罵曾就六四發表謬論嘅呂智偉而被控刑事恐嚇。呢場補選先前已經招風雨，傳聞黨內核心唔滿意維園阿哥「扮大佬」，又有指大量年輕會員都不滿佢成日周圍亂講嘢，所以喺網上群起撰文撐小辣椒，但維園阿哥就有創黨主席黃毓民撐腰。
維園阿哥話做咗行委會積極為黨帶嚟新思維。輸咗嘅小辣椒就話，唔覺得自己輸咗，事關有競爭先有進步，喺今次補選睇到社民連嘅希望喎，仲話希望佢嘅支持者可以善待維園阿哥，認真有大將之風！