阿Paul同白韻琹兩公婆平日都係夫唱婦隨，尋日老公出席公開論壇，白姐姐就打扮到pink lady咁做「跟得夫人」嚟撐場。話說阿Paul喺台上係咁插旅議會理事清一色係旅行社老闆，導遊代表都唔見一個；一時又話要捉晒啲旅行社老闆、導遊「照肺」，加強同內地溝通取締低團費之餘，更重要係徹底改革入境團監管制度。坐喺台下嘅白姐姐睇得肉緊，即使節目直播時間完咗，加時都要舉手發言，話佢屋企三代都做旅遊，當年旅議會成立，佢喺背後都出唔少力。

幫恩師爭番啖氣？

講到興起，白姐姐咬牙切齒咁鬧旅議會成日收收埋埋啲旅行社會費同導遊證費，「又食又拎又監管……」，主持即刻打斷佢問有監管咪好囉？點知白姐姐一於少理，繼續話旅議會「廢嘅」，「成日自己圍威喂，出咗事先出嚟講吓！」

係咁畀阿Paul兩公婆台上台下夾攻，唔知係聽得多都厭吖抑或想避吓風頭，同場嘅旅議會主席胡兆英並冇動氣，好平淡咁話成日都有同屬會代表溝通，依家應該集中諗計點樣補救旅遊業聲譽，唔係傾自唔自己人嘅時候。

相信大家都仲記得當年阿Paul嘅恩師侯叔祺高調出嚟爭旅議會理事同主席，點知理事都入唔到圍之餘，主席又冇得爭，今次阿Paul同白姐姐兩公婆係咁亂槍掃射，唔知係咪同呢單嘢有關呢？