海洋公園嘅哈囉喂已成城中盛事，今年九月呢個活動就踏入十周年，硬撼香港迪士尼樂園五周年，已經玩過鬼新娘、殭屍造型，甚至連中國紙紮公仔都扮過嘅海洋公園主席盛智文會出乜嘢招呢？答案係3D特技易容化妝。
3D特技易容化妝第一個步驟就係倒模。扮嘢文話，早排有技術人員為佢倒模，由頭到頸都淋上白色倒模物料，過程用咗四十五分鐘，「成塊面畀嘢冚住晒，得番兩個鼻窿抖氣，其實都幾恐怖，惟有諗吓其他嘢打發時間，好似蘭桂坊呀、布吉島啲生意同埋海洋公園，希望快啲搞掂。」
之後將石膏或水泥注入模內，複製出同扮嘢文一模一樣嘅塑像，化妝師之後再利用塑像，為佢創造全新造型，甚至易容或改變面貌特徵！扮嘢文仲話，今年嘅哈囉喂一定係歷來最大規模，八間鬼屋會加入最新科技元素，包保大家嚇餐死。聽聞扮嘢文會做其中一間鬼屋嘅屋主，唔知到時會唔會用呢啲塑像搞鬼嚇人呢？