社民連最近被指黨內鬧分歧，事緣成員「維園阿哥」任亮憲被勸退參選南區區議會補選，仲有指佢同社民連秘書長季詩傑有心病。尋日佢兩個前後腳出席同一項活動，開始時彼此全冇交流，疑似面左左，喺傳媒要求下，先至懶老友咁一齊合照，不過，兩個人講嘢都唔多對嘴。
維園阿哥笑笑口咁話佢冇同任何人有心病，其他人就唔知喇！又自言可能係入黨日子尚淺，就膽粗粗走去參選社民連行政委員會，因而令某啲人有微言。
至於被指有意喺港島區出選、仲暗中發功想踢走維園阿哥嘅季詩傑就話，維園阿哥的確對捕捉時事問題非常快手，問題係有時把口快過個腦，再者對方人氣咁高，講完啲嘢會令人以為係代表成個黨嘅立場。咁講，係咪即係話維園阿哥講嘢唔經大腦，扮大佬唔跟黨立場發言呢？