高永文醫生多年嚟醉心公職，平時好少同屋企人出席公開活動，尋日佢應邀到書展同小朋友講故事，大仔高偉琛同細仔高樂琛罕有咁孖住去撐場。偉琛依家就讀港大醫學院三年級，而樂琛就喺英國讀生物化學，可謂一門雙傑。不過，佢哋兩兄弟細個都好少聽到高醫生講故事，家吓爸爸公開講述南丁格爾嘅奮鬥故事，難怪吸引佢哋扮小朋友捧場啦！
高醫生早前同太太及兩個囝囝去咗日本東京旅遊，雖然暑假仲有成個月，但佢唔打算再去第二個行程嘞。偉琛自言想留喺香港Hea吓，去到邊食到邊。
高醫生尋日講完故事之後，再帶埋兩個仔去撐自己契仔、經歷八仙嶺山火慘劇重生嘅張潤衡嘅新書簽名會，張潤衡嘅契媽、前高官李麗娟亦有撐場。據講張潤衡早前喺美國同拍拖多年嘅女友Rainbow拉埋天窗，計劃稍後去香港教育學院修讀生命與教育博士課程。