周末書展有唔少講座，行政會議召集人梁振英（CY）尋日都現身書展，出席前天文台台長林超英（黑英）嘅新書宣傳活動。原來黑英係CY中學師兄，呢個「雙英會」本來噱頭十足，但CY講嘢太行貨，一度悶悶哋，呢個時候，展板上忽然殺出隻「小強」（蟑螂），平日表現穩重嘅CY都忍唔住一再回頭睇佢爬咗去邊，真係搶晒風頭。
黑英本新書叫做《天地變．何處安心》，宣傳活動進行時，一隻估計有兩、三吋長嘅小強突然喺「雙英」背後嘅布景板出現，仲好似行Catwalk咁，前前後後上上下下來回爬咗幾轉，坐喺嘉賓席嘅CY多次忍唔住回頭
吓隻小強，似乎唔多安心。黑英就處變不驚，冇分神之餘，演講亦唔受影響。
天文台其中一項主要工作係就惡劣天氣警告市民，黑英坦言佢為咗令到啲市民冇咁憂慮開心啲，不時會諗啲聽落有啲詭辯嘅警告同講解方法，仲話「呢個世界靠詭辯，好多嘢講講吓就通」。唔通○八年颱風鸚鵡襲港時，佢對「清晨」一詞嘅解說就係一例？咁天文台日前嘅暴雨警告有冇問題？黑英呢次就唔敢「詭辯」，只係話唔會評論佢班舊兄弟嘅工作。