三十幾年前已察覺問題

發叔尋日為馬灣鄉事委員會新大樓奠基儀式主禮，問到政府力推喺各區興建骨灰龕，佢憶起自己早喺七、八十年代做博愛醫院主席同仁愛堂主席時，先後兩次向政府提議喺屯門興建骨灰龕，並獲當時嘅政府批准，但後來因為種種原因未能成事。

當時發叔已經察覺本港有骨灰龕短缺嘅問題，仲形容骨灰龕好似垃圾站一樣，人人都需要用，但人人都唔想設喺自己門口，但係做人嘅嘢「先正己，後正人」，發叔於是喺三十幾年前建議喺屯門興建大型骨灰龕，以應付未來需求。

鄉議局協調統籌有經驗

時至今日，發叔仍然堅持要興建大型骨灰龕解決需求，所以鄉議局近日都提出過有關計劃。發叔尋日強調，鄉議局熟悉民情同鄉情，喺協調同統籌工作方面有經驗，如果搞得好嘅，自然冇反對聲音，講得有道理嘅，啲人自然會聽你講，希望政府考慮吓佢哋嘅建議。

不過，政府係咪諗得通、放膽做又係另一回事。香港骨灰龕短缺嘅問題糾纏咗三十幾年，由港英到家吓，都冇人敢大力推動，政府高官又船頭驚鬼、船尾驚賊，點做得成事呢？