政府四年幾前起咗全港首個將街市、圖書館、室內運動場同泳池集於一身嘅大角咀市政大廈，食環署當時仲吹水，話現代化設施可以帶來舒適嘅購物享受喎。點知幾年光陰，享受免問，「驚喜」就大把，大廈已經變咗「污水立方」同「老鼠樂園」。

呢，做做下生意，頭殼頂假天花會失驚無神淋啲污水落嚟，搞到你狼狽不堪。檔主焗住即時收檔，連舖租都蝕埋。天花滲水唔係一次半次，最恐怖嘅係，每次污水從天而降，位置都唔同，十足冰島啲間歇性地熱噴泉，或者著名嘅聖彼得堡夏宮花園噴泉咁，防不勝防，問你驚未？

據講，「污水立方」主要係喉管淤塞引致，有檔戶已經向食環署投訴同索償，亦有油尖旺區議員懷疑，污水管設計根本滿足唔到排污需要，亦有可能係食環署員工做嘢求其，通渠不力。

政府畀市民「驚喜」，例牌好事成雙。原來大角咀市政大廈仲有一景，就係老鼠大巡遊嘞。呢度老鼠唔止夠大，仲夠多，經常成群結隊周圍出沒。呢，淨係今年頭六個月，已經有一百零一隻老鼠「落網」同被毒殺。由於當局唔准檔戶養貓，有商戶惟有自費裝鐵絲網防鼠，簡直係勞民傷財。

叮！食環署免費提供「休憩場地」，老鼠梗係開心啦，不過市民就慘咯。專家指出，老鼠可以傳播漢他病毒、斑疹傷寒等，病情嚴重嘅足以致命。萬一有市民喺呢幢大廈中招，試問食環署孭唔孭得起！

新街市，舊管理，食環署墨守成規，不思改善，就算設計再現代化都嘥氣，到頭來一樣金玉其外，敗絮其中。講番鼠患呢筆，當局話就話要想盡辦法滅鼠，又搞清潔騷，又增聘專家，但到頭來除咗卸膊乜都做唔成。前排發生多宗老鼠咬人事件，人人談鼠色變。食衞局局長周一嶽居然滿口歪理，唔檢討自己滅鼠不力不特止，反而賴雨水多將老鼠趕晒出地面。

一流街市養老鼠，九流管理水長漏。正所謂，上樑不正下樑歪，周一鑊問責局長變卸責局長，轄下食環署亦有樣學樣，卸得就卸。前線員工懶得就懶，Hea得就Hea，有乜理由污水唔愈滲愈勁，老鼠唔愈滅愈猖狂吖？

話時話，有周一鑊同食環署照住，香港老鼠正逐步升呢，由陰溝坑渠移民到現代化設計市政大廈，好食好住，點捨得走？計太一叮話齋，如果老鼠想繼續升呢，下一個竇，睇怕係禮賓府咯。叮！