香港醫學會尋晚舉行周年大會，並選出新一屆會長，由前任會長蔡堅以一千三百八十票高票當選，撼贏另一對手、獲五百八十票嘅西醫工會會長楊超發，蔡堅成個競選隊伍亦成功爭贏副會長、會董嘅職位。
話說今次競爭戰況好激烈，兩位醫生都好有資歷，一直致力為醫學界謀福利，最近更四出向業界洗樓拉票，宣傳政綱。蔡堅重任會長後話，首要任務係培育新人，訓練多啲左右手，解決醫學會內部青黃不接嘅問題，另要同當局處理醫療界嘅大議題，如公私營合作、醫療融資政策等，積極收集業界嘅意見。
已成為前會長嘅謝鴻興醫生，尋晚成功交棒後，就向記者訴苦話過去兩年做會長嘅工作好辛苦，依家終於可以將膊頭上呢個重責交番畀蔡堅，希望佢繼續完成各項艱巨嘅任務喎！