本文重點
青協同港大暑期青年領袖學校尋日舉行開幕禮，請嚟發展局局長林鄭月娥嚟講Talk，佢認為做一個領袖，做上司應該鼓動下屬努力做嘢，對下屬唔可以威嚇而係要了解下屬嘅難處，唔係交咗難題畀下屬就算，需要提供埋解決方法畀下屬，否則搞到下屬以後唔敢同上司講佢嘅困難嘅話，咁就唔係好領袖嘞！
厚顏自吹自擂
佢仲提及當年佢係最年輕嘅社署署長，當時通縮要削減綜援，雖然畀好多人批評，但佢認為係做得啱嘅，亦相信以後冇人敢咁做。
跟住佢話做領袖一定要有執行嘅能力，要做嘅政策就一定要做，唔可以因為政治因素、惡意嘅傳媒，就乜嘢都唔做，而政策必須要以民為本，唔係單靠口號。
外界形容林鄭係「好打得」嘅局長，但聽完呢半粒鐘嘅演講，真係領教到乜嘢叫做自吹自擂，講到自己天下無敵咁。官場流傳，佢係「下屬殺手」，亦曾有傳言指佢同下屬不咬弦，情願過檔去其他政策局，佢竟然仲可以大講上司下屬關係？仲有，佢提及削減綜援件事，講到前無古人後無來者咁，但又唔見佢提到近期塌樹、骨灰龕搞到一鑊泡！